Willemstad – Korte di Hustisia di Kòrsou ta buska hóbennan ku lo ke para un ratu den sapatu di un abogado, un sospechoso òf fiskal. Nan por haña e oportunidat aki den un Moot Court (korte pa praktiká) durante di e Dia Habrí di Korte di Kòrsou djadumingu 14 di òktober 2018.

Hóbennan ku por konvensé otronan
Pa e Moot Court nos ta buska hóbennan entre 15 ku 20 aña. Bo ta gusta konvensé otronan di bo punto di bista? Bo ke hunga ròl di sospechoso? Lo bo ke ta abogado pa un dia, defendé un sospechoso i konvensé hues ku e sospechoso ta inosente? Òf bo ke para na lado di Ministerio Públiko i prueba ku e sospechoso a kometé un akto penal i mester haña kastigu pa esaki? Esaki ta bo chèns! Bou di guia di un fiskal i un abogado lo bo wòrdu prepará pa e Moot Court. E Moot Court ta na papiamentu.

Hues durante Moot Court
Durante di e Dia Habrí nos lo skohé un bishitante pa sinta huntu ku e hues pa duna un veredikto riba e kaso penal den e Moot Court. Tur ku ta interesá ku tin 15 aña òf mas por bishitá e Dia Habrí di Korte dia 14 di òktober i duna su nòmber. Algu promé ku e Moot Court kuminsá ta skohe e ‘hues’ èkstra.

Registrá
Registrá promé ku 13 di sèptember pa e Moot Court dor di manda un mail pa sabrina.desmet@caribjustitia.org. Tin espasio pa 5 hóben. Si nos haña registrashon di mas hóben nos lo hasi uso di loting pa skohe 5 nòmber.