Korte ta presentá su Relato anual 2017 ku e tema ‘Resistensia’

Korte Komun di Hustisia di Aruba, Kòrsou i Sint Maarten i di Boneiru, Sint Eustatius i Saba (Korte), a presentá su Relato anual pa aña 2017 na prensa djárason 23 di mei. E aña aki Korte ta ofresé públiko en general un relato anual interaktivo. E edishon aki ta spesial pa motibu ku banda di e entrevistanan skibí, loke ta usual, tambe por mira e imágennan di vidio di e entrevistanan aki. Tema di e Relato Anual di 2017 ta: ‘Resistensia’. Konsekuensianan di orkan Irma i esfuerso di koleganan di Korte pa sigui garantisá hurisprudensia, apesar di e sirkunstansianan sumamente difísil. P’esei esaki tabata e inspirashon pa duna e Relato anual di aña 2017 e tema aki.

Personal di Korte
Na 2017 a bin kambio den komposishon di e kuerpo di maneho di Korte. Eunice Saleh, kende tabata visepresidente di e ofisinanan na Kòrsou i Boneiru a keda nombrá komo presidente. Peter Lemaire a asumí e funshon di visepresidente di e ofisina na Sint Maarten, despues di a okupá e mesun funshon na e ofisina na Aruba pa algun aña. Algun miembro nobo a keda nombrá den e kuerpo di maneho. Esakinan ta: Mauritsz de Kort komo visepresidente di e ofisinanan na Kòrsou i Boneiru, Jaap Sap komo visepresidente di e ofisina na Aruba i Coryse Barendregt, kende tabata mènedjer di e ofisina na Kòrsou, a keda nombrá komo direktor di operashon. Den e relato anual di 2017, miembronan di e kuerpo di maneho ta reflekshoná riba nan eksperensia durante e promé aña den nan funshon nobo.

E Relato anual di aña 2017 ta brinda e posibilidat pa será konosí ku algun ‘Personal di Korte’, pa medio di imágennan di vidio di e entrevistanan sostené. Por haña un bista di eksperensianan di un “raio” (“rechterlijke ambtenaar in opleiding”: funshonario hudisial den treinen), den su treinen pa bira hues. Banda di esaki dos hues ta splika algun kaso bastante impaktante di Aruba (Lunah) i Kòrsou (kasonan moral). Tambe por sera konosí ku dos kolega, ku huntu tin mas di 60 aña di servisio na Korte, den e kapítulo ‘Personal di Korte’. Finalmente nos ta mira bèk riba orkan Irma, huntu ku un kolega ku a eksperensiá e orkan. E ta e último persona ku a bandoná nos edifisio monumental “Courthouse” na Sint Maarten i alabes e promé ku a bai tuma nota di e daño okashoná, na momentu ku Irma a kaba di pasa. Den un entrevista konmovedor, e ta deskribí su eksperensianan, su sentimentunan i kon e, komo grefir di visepresidente di e ofisina na Sint Maarten, a tuma parti na e promé seshonnan di Korte den prizòn, algun dia despues ku e orkan a kaba di pasa riba Sint Maarten.

Wesnan lokal
Den 2017 a kontinuá ku e maneho di Korte pa atraé mas hues lokal. E proseso di selekshon, ku a start den 2017, tabatin komo resultado ku un kandidato di Aruba a kuminsá su treinen pa bira hues na 2018 na Kòrsou. Den 2017 a yena en total 6 espasio pa treinen den trayektonan “rio” (“rechter in opleiding”: hues den treinen) i “raio”. Dos kandidato den treinen a bai Ulanda na 2017 pa finalisá e lastu fase di nan treinen.

Kantidat di kaso
Na aña 2017 a entregá un total di 44.067 kaso na e Kortenan di Promé Instansia. Na Aruba a drenta 11.427 kaso, Kòrsou 26.105, Sint Maarten 4.499 i BES 2.036. Na 2016 a entregá un total di 37.510 kaso, pues, tabatin un kresementu di 17%. Prinsipalmente subida di 24% di kasonan penal a atribuí na e subida. Na 2017 a prosesá 22% mas kaso, den komparashon ku 2016. E subida mas supstansial (65%) ta den Derechi atministrativo (kasonan di belasting) na tur ofisina. E subida ta konsekuensia direkto di e e kantidat di kasonan pa aña na e diferente ofisinanan.

E totalidat di kasonan den apelashon ku a entregá a baha ku mas o ménos 8%, di 811 den 2016 pa 743 den 2017. Por opservá e bahada aki prinsipalmente den kasonan sivil (-16%) i kasonan di ámtenar (-9%). Esaki ta un nota positivo, ya ku e kantidat di kasonan, di e kategoria aki, konkluí den promé instansia ta mustra hustamente un subida. Esaki ta impliká ku e persona ku tabata buska su derechi aña pasá, tabatin ménos biaha un motibu pa apelá tòg, despues di e veredikto den promé instansia.

Realisashon di Plan anual 2017
E plan anual di 2017 ta hasi menshon di e intenshon di Korte su kuerpo di maneho pa pone énfasis riba profeshonalismo i un operashon mas komersial. Den e Relato anual di 2017, Korte ta mira bèk riba e proyektonan planiá i ta amplia riba algun di nan. E proyektonan ta keda kategorisá den kuater tema sentral: mehorá aksesibilidat na hurisprudensia, salbaguardiá konfiansa di e siudadano den hurisprudensia, stimulá profeshonalismo i kalidat i finalmente, mehorá servisio na kliente. Ta menshoná si e proyekto a logra, si ta kontinuá kuné den 2018 òf ta sigui kuné mas den futuro. A dediká èkstra atenshon na entre otro GEAR (un sistema di registrashon di kaso desaroyá dor di Korte, ku mester sòru pa kasonan ku drenta keda prosesá di forma mas efisiente), hasi prosesonan di trabou LEAN (“Leren Echt Anders Denken”: siña pensa diferente di bèrdat) i minimalisá desperdisio i e alohamentu di e ofisinanan na islanan BES i Sint Maarten.

Finansa
Korte a sera e aña finansiero ku un pèrdida di f 1,503 mion. Pa un parti hopi importante esaki ta konsekuensia di invershonnan nesesario den digitalisashon i outomatisashon (sistema pa registrashon di kaso GEAR) di Korte, preparashon di un provishon en konekshon ku miembronan di personal ku tabata malu pa largu tempu i dianan di fakansi no-tumá, pa asina keda garantisá kontinuidat di hurisprudensia i tambe e gastunan adishonal debí na orkan Irma na Sint Maarten. Gastunan èkstra debí na posibilidatnan limitá di biahe, organisashon di un konferensia internashonal i limpiamentu di e archivonan na e ofisinanan di Aruba i Kòrsou tambe a kontribuí na esaki. Lo akapará e kontratempu aki for di Korte su Kapital Propio.

Un i tur por lesa i wak e Relato anual 2017 digital i interaktivo di Korte.