Dia Habrí ku hopi informashon i suspenso

Willemstad - Djadumingu 14 di òktober Korte di Hustisia ta habri su portanan pa públiko durante un dia habrí. E ta bai bira un dia informativo di 11:00 am pa 3:00 pm. Bishitantenan por hasi pregunta tokante kon pa kuminsá un kaso den un ‘Speeddate ku Korte’. Tambe tin presentashon di ‘Mediashon durante un kaso’ (Mediation naast rechtspraak). Banda di esaki bishitantenan por saka potrèt ku toga bistí den sala di Korte i nan  por sinti nan mes hues pa algun minüt. Pa e chikitinnan lo tin un huki kreativo.

Apertura eksposishon studiantenan di Adriana’s Academy of Arts & Sciences

Den e pasio prinsipal di e edifisio di Korte di Hustisia ta kologá algun kuadro di studiantenan di Adriana’s Academy of Arts & Sciences. E kuadronan ta ilustrá diferente edifisio monumental den entre otro Skarlo i Punda. Lo kuminsá e Dia Habrí ku apertura di e eksposishon aki pa públiko 11:00 am. Bin atmirá e pinturanan ku kasi no por distinguí for di un potrèt di bèrdat.

Moot Court: Kaso Skrufdrai
Durante di e dia tambe lo tin Kaso Skrufdrai den Moot Court (korte di ensayo). Den e kaso aki nos hóbennan lo ta hunga ròl di sospechoso, abogado i fiskal. E kaso ta trata un situashon ku a sali kompletamente for di man den kurá di skol entre dos hóben. E sospechoso mester responsabilisá su mes dilanti hues. Kiko Korte lo dikta? No pèrdè Kaso Skrufdrai.

Moot Court: bo ke yuda dikta sentensia den Kaso Skrufdrai?
Durante Kaso Skrufdrai un persona den públiko por haña e chèns di sinta na mesa bèrdè komo hues. Tur esnan for di 15 aña i ku ta interesá por duna nan nòmber delantá riba e Dia Habrí mes. Pa 12:30 pm ta saka nòmber di e 'hues èkstra' pa e bai prepará e kaso huntu ku dos hues den Korte di Hustisia. E Moot Court ta kuminsá 1:00 pm en punto.