Relato anual 2018 Korte Komun di Hustisia den Desaroyo

Djamars 14 di mei último Korte Komun di Hustisia di Aruba, Kòrsou , Sint Maarten i di Boneiru, Sint Eustatius i Saba a presentá su relato anual pa 2018 na prensa di Kòrsou i Boneiru. E edishon aki di e relato anual tin komo tema: Desaroyo. E enfoke di Korte den 2017 i 2018 tabata profeshonalisashon, kalidat i amabilidat i komo tema prinsipal: Un kas na òrdu. Den realidat un kas nunka no ta kla kompletamente, pa motibu ku semper tin algu pa drecha, kambia, modernisá òf mantené. Korte ta kontinuamente den desaroyo i netamente pa e motibu aki a skohe e tema en kuestion pa e relato anual aki.

Hurisdikshon
Kantidat di kasonan
Na 2018 a entregá un total di 37.433 kaso na Korte di promé instansia. Esaki ta un disminushon di 14% kompará ku aña 2017 unda 43.426 kaso a tuma lugá. E disminushon aki tin di haber ku un bahada di 18% den kasonan penal. Na 2018 a drenta un kantidat di 27.452 kaso penal. Na 2017 esaki a suma un kantidat di 33.609.
Pa loke ta trata kasonan prosesá, esaki a suma un kantidat di 37.635 na 2108 ku a konkluí na un disminushon di 11% kompará ku aña 2017, unda 41.707 kaso a keda atendé. E disminushon tin di haber ku un kantidat di 18% ménos di kasonan penal atendé (27.452 vs. 33.609). A konstatá un kresementu di 19% den finalisashon di derecho atministrativo.

E kantidat di kasonan ku a bai apelashon a subi ku 8% na 2018 (1.258). Kompará ku 2017 (1.162). E oumento aki tin di haber ku hurisdikshon di derecho sivil (751 vs. 653) i kasonan penal (228 vs. 199). E kantidat di kasonan di apelashon ku a wòrdu prosesá na 2018 tabata haltu den tur hurisdikshon. Un total di 874 kaso a ser atendé den komparashon ku un kantidat di 654 na 2017 ku ta hiba nos na un oumento di 34%.

Publikashon
Transparensia di kasonan den Korte Komun di Hustisia ta importante pa mantené e konfiansa den hurisdikshon di e siudadano. P’esei publikashon di sentensianan (anónimo) ta forma parti di esaki. Korte ta pone sentensianan disponibel pa publikashon riba rechtspraak.nl. Na 2018 a konosé un oumento chikí den e kantidat di publikashon. Esaki tabata 1.805 den komparashon ku 1.694 na 2017.

Kasonan ku a hala hopi atenshon
Korte Komun di Hustisia ta trata anualmente hopi kaso. Tres kaso ku di un manera òf otro a kousa impakto riba e islanan ta wòrdu nombrá den e relato. E suspenshon di pago di InselAir International B.V. E kaso aki a ser siguí pa tur isla i país den nos region pa motibu di e konektividat ku e aerolínea tabata brinda. Seguídamente na Islanan BES, apsolushon di un sospechoso na Boneiru ku a wòrdu akusá di a kometé aktonan seksual ku un dama ku na e momentu di e akto tabata bou di influensha i konsekuentemente no tabata kompletamente na su konosementu, a sòru tabata tin komo konsekuensha ku a adaptá kódigo penal. Por último e kaso na Sint Maarten ku a hiba e nòmber Emerald kaminda a hasi denunsianan inkorekto di impuesto riba entrada i benta. Bou di e shete sospechosonan tabata tin un parlamentario ku a keda kondená.

Hurisdikshon na Sint Eustatius i Saba
Atenshon èkstra ta ser poné na Saba i Sint Eustatius. Hues suplente Monique James-Brown i sekretario di Korte eksterno Rianna Bennett ta konta den un video tokante nan trabou i eksperensianan na Sint Eustatius. Èks hues suplente Sydney Sorton di Saba tambe ta bini na palabra durante e video pa konta tokante su karera riba e isla. Vicepresidente di Sint Maarten,Peter Lemaire, ta duna splikashon tokante e servisio na Saba i Sint Eustatius.

Huesnan lokal
Korte Komun di Hustisia ta keda aspirá pa atraé huesnan lokal. Na 2018 tabata tin sinku hues den preparashon profeshonal na Korte. Dos di nan a finalisá nan estudio ku éksito i a ser nombrá miembro di Korte. Di e demas tres huesnan dos a bai Ulanda pa profundisá nan mes den Korte di Hustisia ulandes i alabes sigui kursonan na Stichting Studiecentrum Rechtspleging, ku ta e instituto di formashon pa poder hudisial i Ministerio Públiko.

Kalidat
Internamente Korte a keda traha riba digitalisashon i mehoramentu di kalidat di prosesonan. Entrante yanüari 2018 tur kaso sivil i asuntunan atministrativo ta wòrdu registrá den un sistema nobo pa registrá kasonan den Korte. E sistema ta ofresé oportunidat pa kolektá informashon di maneho i trámitenan finansiero manera Korte ’griffierechten’. For di yüni último kasonan penal na Sint Maarten ta ser implementá i reglá. Pa Boneiru esaki a tuma lugá den òktober. Debí na esaki huesnan mester biaha ménos dia adelantá pa preparashon di un kaso loke ta spar nan tempu i alabes ta redusí gastunan di estadia.Digitalisashon tin tambe komo bentaha ku e diferente islanan por traha mas fásil huntu.

Alohamentu
Korte di hustisia tin 4 establesimentu, pero ta sirbi tur seis isla. Na Aruba Korte a drenta un akuerdo ku pais Aruba tokante e uso di e edifisio di Korte. Esaki ta enserá entre otro mantenshon di e edifisio i tambe kompensashon di esaki.
E edifisio di Korte na Kòrsou aktualmente tin problema struktural. Despues di un investigashon amplio a resultá ku mester hasi renobashon drástiko na henter e edifisio pa por resolvé tur e problemanan aki. Un kalkulashon básiko di e gastunan di renobashon a ser entregá na Minister di Hustisia na final di 2018.
A mehorá e edifisio ikono konosí komo ‘Courthouse’ na Sint Maarten i e edifisio anekso. Ámbos edifisio a sufri dañonan den kuadro di orkan Irma. Ainda tin mas reparashon ku mester tuma lugá. E edifisio no ta kumpli ku tur e eksigensianan funshonal pa un Korte di hustisia moderno i sigur.
Na Boneiru ta buskando un lokalidat nobo ainda. Korte tin dos opshon na bista. Elaborashon i eskoho definitivo pa ku e lokalidat nobo lo tuma lugá e aña aki. Pa e islanan di Sint Eustatius i Saba ketu bai ta difísil pero pronto lo bini kambio den esaki. En todo kaso na Sint Eustatius Korte lo djòin ku Ministerio Públiko den un edifisio ku anteriormente tabata un botika, miéntras na Saba Korte lo bai tin un lokèt den Bestuurskantoor. Esaki lo hasi hurisdikshon na dos islanan mas aksesibel.

Finansa
Korte Komun di Hustisia a sera 2018 ku un resultado positivo di 275.000 florin. E resultado aki a ser okashoná dor di gastunan insidental di 689.000 florin ku no ta prosedente di for di eksplotashon di empresa (bedrijfvoering) regular. Si akaso e resultado wòrdu koregí, Korte lo a hiba un pèrdida den 2018 di 414.000 florin. E pèrdida aki ta komprendibel debí ku Korte tabata tin un tarea di ekonomisá aproksimadamente 1.3 mion florin. Bestür a hiba un maneho di ekonomisá estrikto ora di kontratá personanan eksterno i gastunan di eksplotashon pa asina por a realisá esaki. Esaki a logra pa gran parti.

E aña aki tambe por lesa e relato anual interaktivo di forma digital. Esaki ta enserá e posibilidat pa por mira e videonan di e entrevistanan tambe.